Спорт сөекле пәйгамбәребезнең мәңгелек васыятьләрен үтәргә ярдәм итә - Татарстан мөфтие

Бисмилләхир-рахманир рахим!

Әссәләәмүгәләйкүм үә рахмәтүллаһи үә бәракәәтүһ!

2016 елның 5 августында Бразилиянең Рио-де-Жанейро шәһәрендә җәйге Олимпия уеннары башлана. Олимпиада уеннарында йөзләгән медальләр тапшырылу, күп илләрнең катнашуы көтелә. Россия данын якларга безнең Татарстан спортчылары да бара.

Спорт чаралары халыкларны, илләрне континентларны берләштерә. Спорт ярышлары уздыру сәламәт җәмгыять корырга ярдәм итә һәм зарарлы гадәтләр китерә торган һәлакәтләрдән саклый. Шуның өчен дә безнең республикада, кешеләр сәламәтлеген кайгыртып, бөтен шартлар тудырыла, һәвәскәр һәм һөнәри спортка ярдәм итү максатыннан, төрле программалар тормышка ашырыла, спорт объектлары корыла.

Имам Мөслим үзенең “Сахих” җыентыгында Мөхәммәд пәйгамбәр салләлаһү гәләйһи вә сәлләмнең “Көчле мөселманны, көчсезгә караганда, Аллаһ ныграк ярата, гәрчә икесендә дә хәер бар” дигән хәдисен китерә. Спорт Сөекле Пәйгамбәребезнең мәңгелек васыятьләрен үтәргә ярдәм итә.

Илебез өчен гади булмаган бүгенге заманда спортчыларның җиңүләре Россия, Татарстан өчен бигрәк тә әһәмиятле. Спортчыларның уңышлары балаларга, яшьләргә сәламәт тормыш рәвешен сайлау өчен бер үрнәк булып тора. Ә спорттагы шатлык мизгелләре илебездә яшәүче күпсанлы милләтләрнең бердәмлеген ныгыта.

Мөхтәрәм спортчылар! Без, мөселманнар, сезгә зур җиңүләргә ирешүне телибез, Аллаһы Тәгалә ярдәмен бирсен!

Татарстан мөфтие Камил хәзрәт Сәмигуллин.