"Вәлиулла Якуповның дини-тәгълимәти мирасын системалы төстә өйрәнү кирәк"

Бүген Россия ислам университетында “Якупов укулары” беренче фәнни-гамәли конференция узды. Анда ТР мөфтие вазыйфаларын башкаручы Габдулла хәзрәт Әдһәмов, ТР Иҗтимагый палата рәисе Илгиз Хәйруллин, татар конгрессының Казан бүлеге рәисе, ТР Дәүләт Советы депутаты Фәрит Мифтахов, РИУ ректоры Рәфыйк Мөхәммәтшин һәм башкалар катнашты.

Чара Коръән укудан башланды.Якупов укулары дин эшлеклеләрен, дәүләт хезмәтләре, фән өлкәсе һәм ММЧ вәкилләрен берләштерү өчен яхшы мәйданчык булырга мөмкин, дип билгеләп үтте Габдулла хәзрәт Әдһәмов. Ул чыгышында дин дәресләре бирүгә басым ясады, балаларны кечкенәдән республиканың махсус уку йортларында традицион ислам нигезләре белән таныштыру кирәклеген ассызыклады, дип яза татар-информ.

ТР Дәүләт Советы депутаты Фәрит Мифтахов республикада Вәлиулла Якупов катнашында төрле дини укулар үткәрелә иде диде. “Ул республикада толерант мөнәсәбәтләрне саклау эшендә мөһим роль уйнаган бик зиһенле кеше иде. Бу безнең өчен зур югалту, без аны искә алырга тиеш”, - дип билгеләп үтте ул.

“Бүген җәмгыятьтә бик катлаулы процесс бара. Бу конференция аларны аңларга һәм тиешле нәтиҗә ясау өчен зарур. Вәлиулла Якупов конференцияләрдә һәм очрашуларда һәрвакыт катнашты, аны зур кызыксыну белән тыңлыйлар һәм хөрмәт итәләр иде. Ул дөньядагы процессларны яхшы аңлый һәм дөрес бәя бирә белде. Аның эшен дәвам итү зарур”, - дип белдерде Россия ислам университеты ректоры Рафик Мөхәммәтшин.

Конференциядә катнашучылар докладлар белән чыгыш ясагач, очрашуга нәтиҗә ясалды һәм резолюция кабул ителде. Анда, аерым алганда, Вәлиулла Якуповның фәнни-дини тәгълиматлар мирасын системалы рәвештә өйрәнү зарур булуы билгеләнде. Конференциядә катнашучылар В.Якупов фәнни-дини тәгълиматлар җыентыгын әзерләп нәшер итәргә, “Бүгенге җәмгыятьтә традицион ислам кыйммәтләре” темасына иң яшы журналист мәкаләсе өчен аның исемендәге премия раслау, В.Якуповның булачак музей проекты концепциясен әзерләргә, шулай ук Апанай мәчетендә мемориаль такта куярга тәкъдим итте. Якупов укуларын ел сен 4 сентябрьдә үткәрү планлаштырыла.

19 июльдә атып үтерелгән Вәлиулла хәзрәт Якупов 20 ел дәвамында татарның дини мирасын кайтару өчен тырышты. Китаплар язды, бастырды, җыеннар үткәрде.

Тимер Сәгыйтов