Киләсе елга ТР мәҗбүри медицина иминияте территориаль фонды бюджеты турында закон проекты тулаем кабул ителде

Бүген ТР Дәүләт Советының унөченче утырышында 2016 нчы елга ТР мәҗбүри медицина иминияте территориаль фонды бюджеты турында закон проекты икенче укылышта һәм тулаем кабул ителде.

Бюджет, салымнар һәм финанс комитетына икенче укылышка ТР Министрлар Кабинетыннан 5 төзәтмә килеп ирешкән. Алар мәҗбүри медицина иминиятенең төп программасын җан башына финанслауның уртача нормативы күләмен киметү белән бәйле. Мәҗбүри медицина иминияте фонды бюджетын беренче укылышта караганда, җан башына норматив 8 мең 727,2 сум тәшкил иткән булган, икенче укылышка ул елына 8 мең 438,9 сумга кадәр кимегән. Мәҗбүри медицина иминияте федераль фонды бюджетыннан субвенция күләме дә 1 млрд 76 млн сумга кадәр кимегән. Фонд бюджеты керемнәре киләсе елга 1 млрд 76 млн 710,3 мең сумга, чыгымнары 1 млрд 479 млн 854,3 мең сумга, дефициты 403 млн 144 мең сумга кадәр кими. Шул рәвешле, керем - 38 млрд 682 млн 180,3 мең сум, чыгымнар – 39 млрд 40 млн 202,0 мең сум, дефицит – 358 млн 21,7 мең сум.

“Татар-информ”