Хәрби хезмәттән качып йөрүчеләрнең 80 проценты хәрби хезмәткә яраклы түгел

Комсомол һәм Тукай районы буенча хәрби комиссариат бүлеге башлыгы Дамир Вәлиев хәбәр итүенчә, көзге чыгарылышта район буенча хәрби хезмәткә чакырылу планы 70 процентка үтәлгән. Чакырылырга тиешле 209 егетнең 177сенә повестка тапшырылган. Шуларның 119ы комиссиягә килгән, калганнары качып йөри икән. Нигездә, болар 20дән башлап 23 яшькә кадәрге егетләр, дип белдерә Тукай районы газетасы.

"Законлы сәбәбе булмаган килеш чакырылыш буенча хәрби хезмәтне үтмәүчеләрнең 80 проценты үзләренең армиягә яраксыз икәнлеген белмиләр, – дип аеруча басым ясады Дамир Вәлиев. – Без әлеге егетләрнең шәхси эшләреннән аларның хәрби хезмәткә яраксыз икәнен күреп торабыз. Моны белмәүләре аркасында үз тормышларын җимерәләр, ата-анасының тынычлыгын бозалар".

Һәр авыл җирлегендә 9, 10, 11нче сыйныф укучылары һәм аларның әниләре белән очрашу, оештыру турында әйтелде. Аларга хокук, хәрби хезмәтнең аерым үзенчәлекләрен алдан аңлату бик мөһим, диелде анда.

“Татар-информ”