Казан һәм Болгар арасындагы юл кырында бердәнбер мәчет ачылды

2013 Сен 18

 
Мәчетнең исеме очраклы гына куелмаган, бу - Болгардан Казанга бара торган юлда бердәнбер мәчет. Аның төзелешенә җир 2006 нчы елда ук бүлеп бирелгән булган. Төзелешкә ике елдан соң керешкәннәр. Мәчет төзелешен башлап йөрүче – Сокурыда яшәүче Азат Гайнетдинов. Икътисади кризис аркасында эшләр берничә тапкыр туктатып торылган булган. Нәтиҗәдә, алар 5 елга кадәр сузылган.

 
Мәчет ачылышы тантанасына Россиянең үзәк өлеше мөселманнарының Диния нәзарәте рәисе Тәлгать Таҗетдин килде. Аның ата-анасы чыгышы белән Лаеш районыннан. Үзенең чыгышында Тәлгать хәзрәт үсеп килүче буынның рухи-әхлакый тәрбиясе өчен мәчетләр төзелешенең мөһимлеген билгеләп узды. Татарстан Республикасы мөфтие Камил Сәмигуллин мәчеттә ислам нигезләрен өйрәнү буенча курслар оештыру әһәмиятенә тукталды. ТР мөселманнарының Диния нәзарәте рәисе "Юлчы" мәчете имамы Галимҗан Кашаповка бәйрәм чапанын бүләк итте.

Тантананың мактаулы кунакларының берсе ТР Дәүләт Советы депутаты Фәрит Мифтахов хәбәр иткәнчә, "Юлчы" белән янәшә мәдрәсә, хайван чалу урыны, автотукталыш, фонтан ачылышы ниятләнә. Алга таба биредә авыл халкы өчен ял зонасы һәм балалар мәйданчыгы да булачак.

 
Гыйбадәтханә ачылышы тантанасында, шулай ук, Лаеш районы башлыгы Михаил Афанасьев, РИУ ректоры Рафыйк Мөхәммәтшин, ТР мөселманнары Диния нәзарәтенең баш казые Җәлил хәзрәт Фазлыев һәм башка дин әһелләре катнашты. Тантана өйлә намазына кадәр дәвам итте дип хәбәр кылды "Татар-информ".