Быел җөмһүриятебез күләмендәге ифтар үткәрелмәячәк

Быел Казанда Республика ифтары уздырылмаячак. Татарстан мөфтияте матбугат хезмәте моны мөселман дин әһелләренә һөҗүм итү белән бәйле соңгы вакыйгаларга бәйләп, иминлек саклау мәсьәләләре белән аңлата.
Баштарак хәбәр ителгәнчә, ифтарны үткәрү урыны итеп күз алдында Спорт сарае яки ипподром тотылган иде. Быел ифтарга чакырылучыларның да саны, узган елга караганда, күбрәк булачак дип көтелде. 2011 елда 1 меңләп кеше авыз ачу мәҗлесендә катнашса, агымдагы елның 16 августында 3 меңләп кешене җәлеп итәргә планлаштырылды.
Узган ел Республика ифтары РФ мөселман эшкуарлары ассоциациясе тарафыннан Казанның 1000 еллык мәйданында үткәрелгән иде дип хәбәр итте "Татар-информ".