БТК БКның киңәйтелгән утырышы һәм “Татарстанның эшлекле хезмәттәшләре” форумына санаулы көннәр калды

4-6 декабрьдә Казанда Бөтендөнья татар конгрессы Башкарма комитетының киңәйтелгән утырышы һәм “Татарстанның эшлекле хезмәттәшләре” форумы уздырылачак.

Әлеге чараларда Россия Федерациясенең 52 төбәгеннән, 23 ерак һәм якын чит илләрдән 600 делегат катнашуы көтелә, шул исәптән татар иҗтимагый оешма җитәкчеләре, татар эшмәкәрләре. Чарага ТР Президент Аппараты, ТР Дәүләт Советы, Казан шәһәре хакимияте, татар зыялылары, ММЧ вәкилләре чакырылачак, диелә БТК БКдан алынган мәгълүматтта.

Программада Бөтендөнья татар конгрессы Башкарма комитетының иҗтимагый оешма җитәкчеләре өчен семинар-лекция; “Төзелеш индустриясендә инновацияләр”, “Энергияне сакчыл файдалану” һәм “Агросәнәгать комплексы: үсеш тенденциясе” дип исемләнгән секция утырышлары; “Татар тарихы” басмасының 7 томлыгын тәкъдим итү кичәсе; «Иннополис» махсус икътисадый зонасына сәяхәт; БТКның “Халкым минем” телевизион тапшыруның 10 еллыгына багышланган тантаналы чара каралган.

Бу уңайдан 2 декабрь көнне  сәгать 11.00дә БТК БК рәисе Ринат Закиров катнашында матбугат конференциясе уздырыла.

“Татар-информ”