“Ак Барс” хоккей командасы капкачысы Эмиль Гарипов дини клипта төшкән

Танылган капкачы Эмиль Гарипов дини җырлар авторы, башкаручы Ильяс Халиковның “Кил син тәүбәгә” дип исемләнгән клибында төшкән. Яңа клипны төшерү тарихы, сюжеты һәм максатлары хакында Ильяс безгә сөйләде:

- Әлеге җырга клипны төшерү теләге миндә күптәннән бар иде. Бер мәҗлестә миңа “Ак Барс” капкачысы Эмиль Гарипов белән очрашырга туры килде. Ул биш вакыт намазны калдырмаучы, динебез һәм милләтебезгә хөрмәт белән караучы спортчы. Без яшь буынга төрле яклап үрнәк булырдай егетебез катнашында клип төшерергә булдык. Татарстан мөфтие Камил хәзрәт Сәмигуллин да безнең башлангычыбызны хуплап, динебез кыйммәтләренә чакыручы клипны төшерүгә үзенең хәер-фатихасын бирде.

Сюжет эчкечелеккә бирелгән элекеге хоккейчы һәм аның спортка гашыйк малае турындагы тарихны тасфирлаудан гыйбарәт. Эмиль очраклы гына әлеге малайны очратып, аның хоккей белән шөгыльләнү хыялын чынга ашыра, әтисенең туры юлга кереп китүенә дә сәбәпче була.

"Әлеге клипны караганнан соң бер генә бала, яшүсмер намаз укый башласа, Аллаһ Тәгаләгә хөрмәтен белдерсә, әти-әниләренә карата мөнәсәбәтен яхшыртса без максатыбызга ирешкән булабыз",- ди Ильяс Халиков.

Нәзарәт сайтыннан.