Татарстан Рәисе Рөстәм Миңнеханов Казанның тарихи мәчетләрендә булды. Аны Татарстан Мөфтие Камил хәзрәт Сәмигуллин, Казан мэры Илсур Метшин, республика Рәисе ярдәмчесе Олеся Балтусова, Мәдәни мирас объектларын саклау буенча Татарстан Республикасы комитеты рәисе Иван Гущин озата йөрде.

Беренче булып Рөстәм Миңнеханов 1802нче елда төзелгән “Иске таш” мәчетен карады. Үз вакытында биредә Яңа бистәнең тормыш үзәге кайнап торган. Совет чорында мәчет ябыла һәм башка максатлар өчен файдаланыла. 

Аннары Рөстәм Миңнеханов реставрация эшләре алып барылган “Әл-Мәрҗани” мәчетен карады. Ул XVIII йөзнең икенче яртысында төзелә. Әлеге мәчет Татарстан башкаласында төзелгән беренче таш мәчетләрдән санала. Ремонт эшләре ике этапта алып барылды. Бинаның ныклыгын тәэмин итү буенча алып барылган эшләр барышында, гөмбәз һәм фасад, манара һәм түбәне дә кертеп, мәчетнең барлык конструкциясе ныгытылды.

Вентиляция, җылыту, кондиционер системалары алыштырылды, суүткәргеч һәм электр белән тәэмин итү челтәрләре яңартылды. Реставраторлар фасадларга барокко стилендәге тарихилыкны кайтарды, декорны, тәрәзәләрне һәм декоратив-нәфис металл эшләнмәләрен торгызды.

Шунысы кызык, Рәискә мәчетне яңа имам күрсәтте. Казанның «Мәрҗани» мәчетенә имам-хатиб итеп моңа кадәр Аксубай имам-мөхтәсибе булып эшләгән Равил Зөфәров билгеләнде. Ә моңа кадәр «Мәрҗани» имам-хатибы булган Мансур Җәләлетдинне мөфти Камил хәзрәт Сәмигуллинның урынбасары итеп билгеләде. Мансур хәзрәт махсус операциядәгеләргә ярдәм өчен җаваплы булачак.