Госман Исхакый: “Нинди генә үзгәрешләр булмасын – бу Аллаһыдан сынау”

Татарстанның элекке мөфтие Госман хәзрәт Исхакыйга 25 майда 55 яшь тулды. Бу датаны Татарстанның дини вә милли элитасы искә алмады. Юбилей уңае белән “Татар-ислам” сайты элекке мөфтигә берничә сорау бирде.

Госман Исхакый 1957 елның 25 маенда Казант шәһәрендә туа. Мөселман дини системасында 1982 нче елдан бирле эшли. “Гарәп дөньясы” югары мөселман мәдрәсәсен тәмамлап, СССРның Европа өлеше һәм Себер мөселманнарының Диния Нәзарәтендә җаваплы сәркатиб булып эшли башлый. Ливиянең Триполи шәһәрендәге Ислам университетының Шәригать факультетында укыганнан соң, Башкортостанның Октябрьск шәһәрендәге “Нуруль-Ислам” мөселман мәдрәсәсендә ректор һәм үзәк мәчетнең имам-хатыйбы вазыйфасын башкара.

1994 нче елда ул Татарстанга кайта һәм Татарстан мөфтиенең беренче урынбасары итеп билгеләнә. 1997 нче елдан - Россия гуманитар фәннәр академиясенең мактаулы академигы. Шул ук елны югары дини уку йорты һәм фәнни учреждение дәрәҗәсендә булган Россия Ислам университетын оештыра башлый. 1998 нче елның 14 нче февралендә Татарстан Республикасы мөселман дин әһелләренең Берләштерелгән корылтаенда – мөфти, ТР мөселманнарының Диния нәзарәте рәисе итеп сайлана. 1998-2006 елларда - Россия Ислам университеты ректоры. Госман Исхакый 2011 елның гыйнварында отставкага китте.
Хәзер Госман Исхакый Кувейтның дин эшләре министры киңәшчесе булып эшли. Җәйне Казанда уздырырга җыена.

- 55 яшьтә кеше тормышка нәтиҗәләр ясый башлый. Сез нинди нәтиҗәләр ясадыгыз?

- Туган көнемә беркемне дә чакырмадым. Кияүләр, баҗайлар, сеңелләр котларга үзләре килде. Шул мәҗлестә әнием хатыным белән мине бастырып: “Улым, беркайчан да йөземне кызартмадың. Шуның өчен зур рәхмәт сиңа”, диде. Менә бу кеше буларак миңа иң зур бәя. Иң мөһиме – кеше булып калып, Аллаһ юлыннан тайпылмаска кирәк.

- Госман хәзрәт, сезнең өчен бүген мөфтилек статус булып калдымы, әллә вазыйфадан киткәч, аның мәгънәсе беттеме?

- Бохарада укыганда шундый бер сүз бар иде: “Мулла булырсың, кеше булмассың!”. Иң мөһиме – кеше булып калу. Минем өчен бүген мөфтилекнең

әһәмияте юк.

- Татарстандагы дини сәясәткә нинди бәя бирәсез?

- Нинди генә үзгәрешләр булмасын, бу Аллаһыдан сынау, иманыбызның ныклыгын тикшерү булып тора.

- Имамнар белән аралашасызмы?

- Дөресен әйтим: мөфтилектән киткәч, күпләр минем белән аралашмый башлады. Ләкин сөйләшүче муллалар калды. Туган көнемдә дә шалтыратучылар булды. Араларында очрашырга теләүчеләр дә бар. Әмма берсе белән дә очрашасым килми.

Госман Исхакый белән Тимер Сәгыйтов сөйләште