Билгеле булганча, биредә бөтен Россиядәге күзләре начар күрүчеләр һәм бөтенләй күрмәүчеләр өчен яңа тернәкләндерү үзәге эшләп килә. Биредә күзләре күрмәүчеләр тормышка җайлашсын өчен, бөтен мөмкинлекләр дә тудырылган.
Моннан тыш, "Ярдәм" мәчетендә теләге булган барлык кешеләр өчен дә Коръәнне яттан өйрәнү курслары оештырылачак. Курсларны Коръән укырга өйрәтү буенча махсус рөхсәте булган Зияратшо Давудов алып барачак. Булачак Коръән-хафизлар өчен биредә бөтен шартлар тудырыла. Алар бу әзерлекләре белән РИУ карамагандагы Коръән-хафизлар әзерләү үзәгенә укырга керә алачак.
Аннан соң биредә ислам нигезләре буенча башлангыч мәдрәсә программасы буенча укулар оештырылачак.
Татарстан мөфтие урынбасары, Ярдәм мәчете имам-хатыйбы Илдар хәзрәт Баязитов мәчет тулы канлы тормыш белән яшәргә тиеш дип саный, дип хәбәр итә мөфтиятнең матбугат хезмәте.
Чыганак: "Татар-информ"