Казанда “Мәүлид ән-Нәби. Җан белән сөйләшү” дигән театральләштерелгән тамаша була

Татарстан башкаласы Казанда “Мәүлид ән-Нәби. Җан белән сөйләшү”дигән театральләштерелгән тамаша тәкъдим ителә. Пәйгамбәребез Мөхәммәд салләлаһү гәләйһи вә сәлләмгә багышланган дини-мәдәни чара 8 февральдә сәгать кичке 7дә Г. Камал исемендәге Татар дәүләт академия театрында була. Беренче тапкыр “Мәүлид ән-Нәби” проекты Мәскәүдә генә түгел, төбәкләргә тур буларак башка шәһәрләрдә дә күрсәтелә. 12 февральда бу тамашаны Уфа, ә март аенда Астана мөселманнары карый алачак, диелә ТР мөселманнары Диния нәзарәте хәбәрендә.

Казандагы чараны исә Россия мөфтиләр шурасы, Россия мөселманнарының Диния нәзарәте һәм Мәскәү шәһәре мөселманнары Диния нәзарәте Татарстан Республикасы мөселманнары Диния нәзарәте һәм “Хузур” нәшрият йорты ярдәме белән оештыра.

Театральләштерелгән тамашаның төп герое – тормышыннан канәгать булмаган яшь мөселман эшмәкәре. Барлык уңышсызлыкларының сәбәбен тирә-як мохиттән генә күрергә күнеккән герой рухи эзләнүләр дөньясына кереп китә. Тамашачы геройның уйланулары аша Пәйгамбәребез Мөхәммәд салләлаһү гәләйһи вә сәлләм яшәгән чор һәм кешелек дөньясын элек-электән борчыган күп кенә сорауларга җавап табу күренешләренең шаһиты була.

Төп рольләрне танылган актер Марат Бәшәров, дин әһеле һәм “Триллионер” проекты авторы Шамил Әләүтдинов, шагыйрь һәм сценарий авторларының берсе Ренат Әбәнов, Камил Фәхретдинов, Рөстәм Мостафин башкара.

Куелышта “Сүзләрсез” бию театры артистлары (Казан) һәм Татарстан дәүләт камера хоры солистлары, Сәидә Мөхәммәтҗанова, Шәрип Умханов һәм 40ка якын башка артист катнаша.

Проектның җитәкчесе – Илдар хәзрәт Әләүтдинов, администратор – Азат Галәмшин, режиссер – Илдар Кәрим, сценарий авторы – Ренат Әбәнов һәм Илгиз Зәйни.

Тулырак мәгълүмат mavlid.ru сайтында бирелгән.
“Татар-информ”