Семинар гадәттәгечә изге Коръән аятьләрен укудан башланды. Аннары катнашучылар сәламләү сүзе белән чыгыш ясады.
Россия Ислам университеты ректорының уку эшләре буенча урынбасары Марат Гыйльманов семинарда катнашучыларны һәм кунакларны сәламләде. Ул вузның ТР мөселманнары Диния нәзарәте каршындагы "Хәләл” стандарты комитеты белән уртак чаралар оештырып күптәннән хезмәттәшлек итүен белдерде.
Россия Ислам университетының Ислам икътисады һәм идарәсе кафедрасы мөдире Галим Вахитов Казахстан кунагына семинарда лектор буларак катнашырга риза булуы өчен рәхмәт белдерде.
Марат Агибаевич Россия хезмәттәшләре белән тәҗрибә уртаклашу мөмкинлеге тудырган өчен оештыручыларга рәхмәт сүзләре җиткерде. Хәләл-индустрия һәр төбәктә аерым үсеш ала, әлбәттә билгеле дәрәҗәгә җиткән дип белдерде. "Әмма киләчәктә дә үсеш алу өчен берләшү зарур. Хәләл-индустриянең киләчәген нәкъ менә бер-беребез белән хезмәттәшлек итүдә күрәбез”, - дип уртаклашты үз фикере белән Сарсенбаев.
Россия Ислам университеты матбугат хезмәте хәбәр иткәнчә, семинар 30 сентябрьгә кадәр дәвам итәчәк. Семинар тәмамлангач, лекцияләргә йөрүчеләргә "Хәләл-индустрия өлкәсендә эксперт дипломнары” тапшырылачак.
Чыганак: "Татар-информ"