«Ярдәм» мәчетендә лифтләр эшли башлады

Шушы көннәрдә Казанның «Ярдәм» мәчетендә 7 һәм 13 кеше сыешлы ике лифт кабинасын эшләтеп җибәрделәр.

Билгеле булганча, “Ярдәм” мәчете каршында Күрмәүчеләрне тернәкләндерү үзәге урнашкан. Бу бина 3 катлы булганлыктан, күрмәүчеләргә баскыч буйлап күтәрелүе яисә төшүе кыен хәл булганлыктан, лифтләргә ихтыяҗ зур иде. Шуңа күрә дә төзүчеләр биредә лифтләр урнаштыру карарына килделәр. Лифтләр шулай ук әлеге үзәктә башка төр инвалидлар да дини белем алыр дигән исәптән чыгып та төзелде.

Шунысын да билгеләп узу мәслихәт: якын көннәрдә “Ярдәм” гыйбадәтханәсе бинасы яңа компьютерлар классы белән дә тәэмин ителәчәк.

Исегезгә төшерәбез: Казанда Күрмәүче мөселманнарны тернәкләндерү үзәге быелның 19 июлендә Коләхмәтев һәм Серов урамнары чатында ачылган иде. 300 кешегә исәпләнгән “Ярдәм” мәчете дә булган мондый 3 катлы мәһабәт бина күрмәүчеләрне рухи яктан тернәкләндерү өчен Россиядә хәзергә бердәнбер булып кала бирә.

Элек бу үзәк башкалабызның Левченко бистәсендәге “Сөләйман” мәчетендә урнашкан иде. 5 ел вакыт эчендә анда оештырылган дини белем алу курсларында 700ләп кеше укып чыкты. Ә мәчетнең “Нур” дигән нәшриятында Брайль системасы буенча меңәрләгән китаплар бастырылды. Күзләре буенча инвалидларга бу курсларны “Ярдәм” Ислам милли хәйрия фонды хезмәткәрләре тарафыннан оештырыла.