Халык һөнәрчеләре халыкка якынайды

Ул көнне урамнан ук төрле төстәге күбәләкләр шикелле балалар – сабый – сабыйлар килүчеләрне каршы алды. Күнче урамында хәләл ярмирнкә гөрләде. Суюнов Сәиддавытның Коръъән укуы белән башланган бәйрәмне ТР мөселманнары Диния нәзарәтенең дәгъват бүлеге җитәкчесе, Апанай мәчетенең имам-хатыйбы Нияз хәзрәт Сабиров дәвам итте. Әлеге мәчеттә дәресләр биргән остазларга Рәхмәт хатлары тапшырылды.

Аннары мәчет биләмәсе дә, Каюм Насыйри урамы да балалар карамагында иде, уеннар, ярышлар, мастер-класслар үткәрелде. А.Алиш исемендәге театр төркеме дә тел кагыйдәләрен белүгә багышланган спектакль күрсәтте. Бирегә килүчеләрнең күңеле бәхет-шатлык белән тулды. Аларга Санкт-Петербургтан, Башкортостан, Томск, Мари Эль, Саранск, Балтач, Биектау районыннан килгәннәр хезмәт күрсәтте.

Ювелир бизәнү эшләнмәләр, күлмәк-камзуллар, яулыклары, калфаклар – татар милли киемнәре күз явын алырлык иде. Халык һөнәрчеләре халыкка тагын да якынайды. Шатлыклы, хикмәтле көн булды ул. Бәйрәмне Миңгол Галиев, Ильяс Халиков һәм аларның шәкертләре, шагыйрьләр Гәрәй Рәхим, Фәйрүзә Мөслимова үзләренең шигырьләре белән куандырды. Апанаев нәселен дәвам итүчеләрдән Илүзә Апанаева үзенең рәхмәтләрен ирештерде.

ТР Премьер-министры киңәшчесе Линар Якуповның чыгышы барыбызны да дулкынландырды, күңелебезгә хуш килде. Дустыбыз Флера Абдуллина халыкның күңелен күреп йөрде.

Әлеге хикмәтле бәйрәм икенче көнне Кабан күле буенча буенда “Печән базары”нда дәвам итте. Менә шулай тынычлыкта, татулыкта, бергәлектә үткән бәйрәмне Бөтендөнья татар яшьләре форумында катнашучылар да Казанга кабат килгәнче исләреннән чыгармас әле.

Әлмирә Һәдия.