Казан Сабан туе 3 мәйданда барачак

Быел нибары 3 мәйданда үткәреләчәк Казан Сабан туе 23 июньгә билгеләнгән булып, аңа әзерлек барышы хакында бүген шәһәр җитәкчелегенең ”эшлекле дүшәмбе” киңәшмәсендә башкала Башкарма комитеты башлыгының социаль мәсьәләләр буенча урынбасары Ләйлә Фазлыева хисап белән чыкты.

Татарларның борынгыдан килгән Сабан туе милли бәйрәме Казанның Мирный, Дәрвишләр бистәләрендәге Каенлыкларында һәм Аккош күле янындагы урман-парк зонасында үткәреләчәк. Аларның беренчесенең әзерлек эшләренә Идел буе һәм Вахитов районнары көчләре җәлеп ителгән, икенчесенә – Совет, Авиатөзелеш һәм Яңа Савин районнары, соңгысына – Киров һәм Мәскәү районнары. Сабан туе чаралары исә "Казан” халыкара атлы спорт комплексындагы ат чабышы һәм су өстендә "Формула-1” узышының II этабы белән кичен төгәлләнәчәк.

Сабан туе мәйданнарында эчке эшләр органнары, медицина, гадәттән тыш хәлләр, кулланучылар хокукларын яклау өлкәсендә күзәтчелек хезмәтләре кизү торачак, 189 автобус халыкны ташыячак.

Сабан туе милли бәйрәм кысаларыннан чыгып, күптән инде интернациональ чарага әйләнде, дигән фикер белдерде киңәшмәгә рәислек иткән мэр Илсур Метшин. "Тарихи мирас елында Чаллы Сабан туенда әнә балалар, өлкәннәр өчен төрле үзенчәлекле традицион ярышларны күпләп оештырганнар, анда теләп катнашалар. Без Сабан туен шоуга әйләндермәскә тиешбез. Шуны онытмасак кирәк: чын авыл Сабан туе элементлары күбрәк булган саен, аның яме дә шуның кадәр артачак, традицион үзенчәлеге чагылачак. Милли гореф-гадәтләр, көнкүреш үрнәкләрен күрсәтү мөһим - шулар белән бәйрәм кызыклы да. Балалар, әби-бабайлар өчен мәйданчыклар күбрәк булсын, ә призлар кыйбатлы булуы белән түгел, һәркемгә тәтүе белән кыйммәт”, - дип басым ясап әйтте мэр һәм оештыру комитетына шушы мәсьәләләргә зуррак игътибар бирүне сорады.
Чыганак: "Татар-информ"