“Идел-хаҗ” компаниясе гомрә кылу өчен төркемнәр җыя

«Идел-хаҗ» компаниясе гомрә кылу өчен яңа төркемнәр җыя. Егерме кешедән торган хаҗ кылучы төркем сәфәргә Казаннан 23 мартта китәчәк.

Компания гомрә кылучыларга дүрт төрле программа тәкъдим итә. Программалар бер-берләреннән шактый аерылмый. Барлык программаларга да виза ясату, очкыч Казаннан Истанбул аша Согуд Гарәбстаны Корольлегенә бару һәм Казанга кире әйләнеп кайту, Согуд Гарәбстанында аэропорттан Мәккә, Мәдинәгә бару һәм кире аэропортка кайту өчен тарнспорт яллау, гомрә кылу тәртипләренә өйрәтү, төркемгә җитәкче билгеләү, әдәбият һәм юл кирәк-яраклары белән тәэмин итү, медицина иминиятләштерүе, Мәккә һәм Мәдинәдә истәлекле урыннарда булу, «Зәм-зәм» суы белән тәэмин итү керә.

Билгеле булганча, гомрә кылуның вакыты чикләнмәгән, шулай да хаҗ чорында гомрә генә кылу өчен виза алып булмый. Чөнки гомрә хаҗ белән бергә кылына.

«Идел-хаҗ» ширкәтенең матбугат хезмәте хәбәр иткәнчә, гомрәне Согуд Гарәбстаны Корольлеге чикләре ачылгач ук кылу яхшы. Чикләр хаҗ сезоны тәмамлангач ябыла.

Рамазан аенда гомрә кылу бигрәк тә саваплы санала. Мөхәммәд пәйгамбәр бу хакта: «Рамазан аенда гомрә кылу хаҗ кылу савабын бирә», - дип әйткән.