Татарстан мөселманнары Диния нәзарәтендә аксакалларның тәүге җыены узды

Татарстан мөселманнары Диния нәзарәтендә Аксакаллар Шурасы дигән яңа бүлек барлыкка килде. Аңа 20 ел һәм аннан да күбрәк имам булып эшләп, хөрмәт казанган дин әһелләре әгъза булып керә алачак.

Кичә, ягъни 1 мартта өйлә намазыннан соң, ТҖ МДН бинасында аксакалларның беренче җыелышы булды. Сүз уңаеннан, Татарстан мөфтие вазифаларын башкаручы Илдус хәзрәт Фәиз имамлык кылган намазда аларның һәммәсе дә катнашмады, чөнки күбесе үз мәхәлләләрендә гыйбадәткә җитәкчелек итте.

Илдус хәзрәтнең билгеләп үтүенчә, мондый структураны оештыру фикере «Солтан» мәчете имамы Камил хәзрәт Бикчәнтәевнең башында туды. Камил хәзрәт әле үзе пенсия яшенә җитмәсә дә, ике дистә ел һәм аннан да артык халыкка хезмәт итү үзеңне аксакал дип әйтү өчен хокук бирә дигән карашта тора.

Бу җыелышта иң өлкән хәзрәтләрнең берсе, Татарстан ЭЭМндагы Мемориаль мәчетнең имам хатибы, Ватан сугышы ветераны, яше 80нән арткан Харис хәзрәт Салихҗанов катнашып, үзенең фатихасын бирде.

Аксакалларның мондый җыенын 2-3 айга бер тапкырдан да сирәгрәк үткәрмәскә дигән карарга киленде. Ә мөфти сайлауларыннан соң, Аксакаллар Шурасының рәисе дә сайланыр дип хәбәр итте «Татар-информ» агентлыгы.