Кувәйт дәүләтенең вакыфлар һәм ислам эшләре министры урынбасарына “Дуслык” ордены тапшырылды

Кувәйттәге әл-Фәлах гаиләсе резиденциясендә вакыфлар һәм ислам эшләре министры урынбасары Гадел Абдулла әл-Фәлахка узган елның ноябрендә РФ Президенты Д. Медведев Россия-Кувәйт элемтәләрен ныгытуда шәхсән өлеш керткәне һәм дини түземлелек фикерен киң җәелдергәне өчен «Дуслык» ордены белән бүләкләү турында карар кабул иткән иде. Шушы көннәрдә аны тапшыру тантанасы үткәрелде.

IslamRF.Ru хәбәрчесе мәгълүматына караганда, тантанада Кувәйтнең Премьер-министры һәм эчке эшләр министры, төрле илләрнең илчеләре, консуллары, дини һәм җәмәгать эшлеклеләре, гаилә әгъзалары, якын дуслар катнашты. Россия ягыннан бу чарада РФнең Кувәйттәге илчесе киңәшчесе Александр Мусиенконы, Россиянең Европа өлеше мөселманнары Диния нәзарәте рәисе урынбасары Дамир хәзрәт Мөхетдиновны күрергә була иде. Хәбәрченең сүзләренә караганда, әлеге очрашу җылы һәм дустанә шартларда барган. Доктор Гадел әл-Фәлах үзен котларга килгән һәркемгә рәхмәт белдергән, истәлек өчен барысы белән бергә фотога төшкән.

«Әл-Вәсәтыя» халыкара үзәге 2006 елда Кувәйттә барлыкка килә. Вәсәтыя атамасы вәсәт дигән гарәп сүзеннән алынган. Ул урта дигән мәгънәне аңлата. Бу үзәк мөселманнар һәм башка конфессия вәкилләре арасында диалогка, түземлелеккә чакыра. Аның бурычы ислам өммәтен бүлгәләү омтылышына каршы хәрәкәт итүдән һәм дөньядагы мөселманнар арасындагы каршылыкларны җиңәргә булышудан гыйбарәт, дип хәбәр итә www.islamrf.ru агентлыгы.