Бүген Казанның Киров һәм Мәскәү районы башлыгы “Сөләйман” мәчетенә килде

Бүген Казанның Киров һәм Мәскәү районы башлыгы Дамир Илдус улы Фәттахов «Сөләйман» мәчетенә килеп, андагы мөселман әһелләренең эшчәнлеге белән кызыксынды.

Билгеле булганча, «Сөләйман» мәчете каршындагы Сукырларны тернәкләндерү үзәгендә күзләре күрмәүчеләрне Брайльчә Коръән укырга өйрәтү эшләре дәвам итә.

Дамир Илдус улы мәчетне карауны биредәге «Нур» нәшрияте бастырган китаплар белән танышудан башлады. Мәчетнең имам хатибы Илдар хәзрәт Баязитов белән нәшрият директоры Илгизәр хаҗи Хәмидуллин кунакларга китаплар нәшер итә торган махсус принтерны да күрсәттеләр.

Хакимияттән килгән кунакларга компьютерда һәм Брайльчә язарга, укырга өйрәнү җиһазлары, әсбаблар зур тәэсир итте дияргә дә буладыр. Киров һәм Мәскәү районы башлыгы Дамир Фәттахов: «Мәчеттә шуның кадәрле эшләр башкарыладыр, дип уйламаган идем»,-дип гаҗәпләнүен яшермәде. Дөрес, Казан мэры Илсур Рәис улы Метшин аңа Коләхмәтов урамында Сукырларны тернәкләндерү үзәге төзелүе турында әйтеп узган. Бу очрашуда әлеге үзәкнең төзелеше хакында да сүз булды.

Саубуллашканда Д. Фәттахов: «Бу юлы әле мин сезгә тиз генә кереп чыгарга, дип килдем. Киләчәктә озаклап гәпләшергә дә, фикерләшергә дә вакыт табылыр. Сезгә булышыр өчен минем мөмкинлегем дә бар хәзер»,-диде.