Казанда мөселманнар үзәге барлыкка килә

Исламны кабул итүгә 1000 ел исемендәге Казан югары мөселман мәдрәсәсе урнашкан «Ал мәчет» базасында тиздән мөселманнар комплексы барлыкка киләчәк.

28 декабрьдә ТҖ МДНнең Үзәк аппараты җитәкчесе, бу мәдрәсә ректоры Ильяс хәзрәт Җиһаншин тантаналы шартларда «Ал мәчет» комплексын тәкъдим итте.

Әлеге үзәктә мәдрәсә, класслар, китапханә, аерым гыйбадәт залы, кибет, хәләл кафе, остаханә һәм административ биналар булачак. Һәммәсе дә аерым милли төсмерләр белән эшләнәчәк. Комплексның архитектурасы көнчыгыш традицияләренә нигезләнеп, мәчет каршындагы мәдрәсә рәвешендә төзелә.

Комплексны тәкъдим итү чарасында ТҖ МДН рәисе, мөфти Госман хәзрәт Исхакый, ТР Президентының дини берләшмәләр белән хезмәттәшлек идарәсе җитәкчесе Марат Гатин, Дәүләт Советы депутаты Фәрит Мифтахов, Казан Башкарма комитетының телләр үсеше һәм иҗтимагый оешмалар белән хезмәттәшлек бүлеге җитәкчесе Ирек Арсланов, «Хәләл» стандарты комитеты башлыгы Илнур Гайнуллин, шулай ук бизнес вәкилләре катнашты.

Проектның авторы — республиканың архитектураны торгызу буенча «Ивар» институты. Алар кунакларга бу проектның һәр детале, һәр бинасы турында тәфсилләп сөйләделәр.