Калининградта мәчет төзелешенә каршы митинг үткәрелде

Калининградта яшәүчеләр шәһәрнең Южный паркында төзелә башлаган мәчеткә каршы ризасызлык акциясе уздырдылар.

Шәһәр хакимияте рөхсәте белән оештырылган пикет паркка керү капкасы янәшәсендә булды. Бу чарада 100дән артык кеше катнашты. Алар мәчет төзелешен туктату таләбе язылган плакатлар һәм транспаратлар тотканнар иде.

Пикетны оештыручылар төзелешкә каршы имзалар җыйганнар. Алар мәчет төзелешенә рөхсәт законны бозып бирелгән, дип расламакчылар. Бу хактагы гаризалар төрле урыннарга җибәрелгән.

Акция милициянең аз санлы хезмәткәрләре күзәтүендә үтте. Бу инде төзелешкә каршы оештырылган икенче пикет. Беренчесе моннан бер атна элек узган иде.

Калининградның мөселманнар мәхәлләсе мәчет төзелешенә ноябрь ахырында кереште. Аңа рөхсәт алу алай җиңел генә бирелмәде. Мәхәллә халкы бу төзелешкә рөхсәтне өлкәнең үзәгендә 1993 елда ук алган иде. Шәһәр җитәкчелеге изге бинаны берничә урында төзергә ниятләгән иде. Ләкин халык бу уңайдан кискен каршы чыкты. Нәтиҗәдә, Калининград өлкәсе шәһәр советы мөселманнарга Дзержинск урамындагы 32 нче йортны бирергә дигән карар чыгарды.

Хәзерге вакытта Калининград өлкәсендә нибары бер мәчет эшли. Ул Олы Исак авылында урнашкан, 2010 елның башында ачылган иде, дип хәбәр итә interfax.ru агентлыгы.