Татар авылларының үз сайты булачак

Узган җомгада «Казан»милли мәдәният үзәгендә Россиянең төрле урыннарыннан килгән татар авыллары вәкилләре җыелды. Анда Бөтенроссия татар авыллары җәмгыяте Советының киңәйтелгән утырышы үткәрелде.

Утырышта 22 татар авылы вәкиле катнашты, киләсе 2011 елга эш планы расланды, бу җәмгыятьнең җитәкчесе сайланды. Ул-Чувашия Республикасы Татарлары милли мәдәнияте ассоциациясе рәисе Рәшит Санзяпов.

Бөтенроссия татар авыллары җәмгыяте (ассоциациясе) Бөтендөнья Татар конгрессы Башкарма комитеты карары нигезендә 2007 елда төзелде Аның максаты татар халкы үсешенә ярдәм итүдән, милли мәдәниятне, мәгарифне, авылда яшәүче татар халкының үзенчәлеген саклаудан гыйбарәт.

Ассоциация әгъзалары үзлеренең алдына мәхәллә системасын торгызуны максат итеп куя. Аларның фикеренчә, нәкъ менә мәхәллә булып оешып яшәүчеләр балалар һәм яшьләрне рухи-әхлакый тәрбияләүдә, әфьюн, эчкечелек һәм террорчылык кебек зыянлы гамәлләрне бетерүдә мөһим роль уйный ала. Бу җыенда катнашучылар Татарстандагы авылларда яшәүчеләргә Самараның Гали, Пенза өлкәсендәге Елюзән, Бистян, Чувашиядәге Шыгырдан кебек авыл әһелләреннән үрнәге алырга чакырды. Islam-portal.ru дан алынган мәгълүматларга караганда, бу зур авылларда яшәүче 6 мең кешегә 6 мәчет туры килә, мәдрәсәләре бар.

Утырышта «Татар авыллары» сайтын тәкъдим итү булды. Бу сайтта Россиядәге 4200 татар авылында булган вакыйгалар чагылыш табар, дип көтелә. Сайт инде әзер, хәзерге вакытта татар авыллары хакында мәгълүмат туплау эше бара.

Сайтның адресы: www.avillar.org.