Госман хәзрәт Исхакый Татарстан мөселманнарын динне сакларга чакырды

РТ Диния нәзарәте рәисе, мөфти Госман хәзрәт Исхакый республиканың Нурлат районында килеп чыккан вакыйгалар уңаеннан, Татарстан мөселманнарына мөрәҗәгать итте. Анда мондый юллар бар:

«Мөхтәрәм өммәттәшләр!

Күптән түгел республиканың Нурлат районында булган хәлләр безне тагын уйланырга мәҗбүр итте. Аллаһының рәхмәте белән безгә вөҗдан иреге бирелде. Советлар Союзы вакытында җимерелгән мәчетләр торгызылды, ябылган мәдрәсәләр халыкка кире кайтарылды һәм аларда шәкертләр укый башлады. Мәчет яки мәдрәсә төзелмәгән бер генә авыл, бистә дә калмады диярлек. Болар барысы да-безгә Алаһының рәхмәте. Советлар заманындагы дәһрилек шартларында иманнарын, динебезне саклап калган әти-әниләребез, бабаларыбыз аның асыл кыйммәтен бөтен барлыгы белән аңлый. Безнең замандагы дин тоту һәм вөҗдан иреге бирелгән шартларда күпләр моны онытты. Шуңа күрә дә мин һәрбер аңлы, иманлы кешегә мөрәҗәгать итәргә булдым. Әйдәгез, Аллаһ тарафыннан бирелгәннәрне саклыйк. Коръәндә Аллаһ: «Әгәр нигъмәтләремә шөкер итсәгез, нигъмәтемне сезгә арттырырмын...» («Ибраһим» сүрәсе,7 нче аять),-диде.

Кайбер сәяси көчләр илдә тынычлык һәм иминлек булуын теләми, алар арабызда фетнә, гауга чыгарырга, дошманлык орлыклары сибәргә тели.

Кадерле кардәшләр!

Бу коткыларга бирешмик! Күптән түгел булып узган вакыйгалар нәтиҗәсендә мөселманнар өммәте никадәрле зур зыян күрә. Без барыбыз да Россия җирендә яшибез. Биредә әтиләребез һәм бабаларыбыз көн күргән, алар безгә динебезне саклап калган. Һәм без дә аны саклап, киләсе буыннарга мирас итеп тапшырырга тиешбез.

Хак Тәгалә безне фетнәләрдән, вәсвәсәләрдән сакласын һәм җиребезгә, илебезгә тынычлык, иминлек бирсен!»

ТҖ МДН матбугат хезмәте