14 ноябрьдә хаҗ йолаларын үтәү башлана. Хәбәрләр. Татар-Ислам

2010 Ноя 12

2010 елда "Кол Шәриф эконом" программасы популяр булды

Быел Согуд Гарәбстанында хаҗ йолаларын үтәү 14 ноябрьдә башлана. 15 ноябрьдә - Гарәфә тавында тору, 16 ноябрьдә - Корбан чалу бәйрәме.

Агымдагы елда, хаҗ кылу өчен, Татарстанга 2000 квота бүлеп бирелгән. Бүгенге көндә төбәкара "Идел хаҗ" үзәге аша бөтен хаҗилар да Согуд Гарәбстанына барып җитеп урнашты.

Хаҗиларның меңнән артыгы - татарстанлы, калганнары - Россиянең төрле төбәкләреннән. "Идел хаҗ" үзәге РФнең 25 төбәге белән эшли, өстәмә офислар ача, - дип яза "Татар-информ".

Быел хаҗилар утырган очкычлар Казан, Мәскәү, Екатеринбург, Уфа, Минеральные воды аэропортларыннан очты. Иң кечкенә хаҗига - 3 ай, иң өлкәненә 86 яшь, елдагыча олы буын күпчелекне тәшкил итә.

2010 елда "Кол Шәриф эконом" программасы популяр булды. Быел бу тур беренче тапкыр кертелде. Ул катнаш "Мәрҗани" программасыннан очкычта Җиддәгә кадәр барып җитүе белән генә аерыла. Былтыр "Кол Шәриф плюс" программасы белән баручылар өчен 200 урынлы кунакханә ялланса да, ихтыяҗ булмау сәбәпле, быел ул программа урыннары кыскартылды. Шулай да әлеге тур иң күп соралучы программаларның берсе булып кала. "Кол Шәриф плюс" программасы буенча туклану һәм "әл Харам" мәчетеннән нибары 800 метр ераклыкта тору каралган, дип хәбәр итә төбәкара "Идел хаҗ" үзәге матбугат хезмәте.