Бездә татарлар яхшы яши, ә өйләнер өчен барыбер Казанга киләләр - Тарья Халонен

Кичә Финляндия Президенты Тарья Халонен Казан шәһәре белән танышты.Тарья Халонен иң беренчеләрдән булып Татарстан Президенты Рөстәм Миңнеханов белән Кол Шәриф мәчетенә аяк бастылар.

Кол Шәрифтә кунакларны мәчетнең имам хатибы Рамил хәзрәт Юныс каршы алды. "Шунысын да билгеләп үтәргә кирәк, Тарья Халонен мәчеткә якынлашкач та үзенең алдан әзерләп куйган яулыгы белән башын каплады. Без ничек кенә яулык турында әйтербез икән дип уңайсызланып тора идек, Аллаһның киң рәхмәтләре яуды, ул үзе әзер булып килгән. Ул гына түгел, аның барлык хатын-кыз ярдәмчеләре дә. Безгә карата зур хөрмәт күрсәткәне өчен бик зур рәхмәтле без аңа", - дип шатланып сөйли Рөстәм хәзрәт Бакиров.

Гыйбадәтханәдә Финляндия башлыгы беренче чиратта  Коръәннең төрле телләрдәге бүләк басмалары саклана торган гыйбадәт бүлмәсендә булды. Рамил хәзрәт Юныс кунакка мәчеткә фин татарлары бүләк иткән фин телендәге Коръәнне күрсәтте. Тарья Халонен, шулай ук, татарларның Финляндиягә XIX гасырда килүен әйтеп үтте. «Бездә татарлар яхшы яши ә өйләнер өчен барыбер Казанга киләләр», — диде ул елмаеп.

Аннары Тарья Халонен һәм Рөстәм Миңнеханов мәчетнең аскы катында урнашкан ислам мәдәнияте музеенда да булды. Кунакка Рамил хәзрәт Кол Шәриф мәчете сурәтләнгән декоратив тәлинкә рәвешендәге сувенир, ә аның хәләл җефете Пентти Араярвига түбәтәй бүләк итте.