Муса Бигиев тарафыннан эшләнгән Коръән тәрҗемәсенең презентациясе булып узды

Бүген Татарстан Республикасы Фәннәр академиясенең актлар залында «Татарстанда һәм Россия төбәкләрендә Коръәни-Кәримне укыту проблемалары» («Проблема преподавания Священного Корана в Татарстане и регионах России») дип исемләнгән симпозиум ачылды. РИУның Коръән хафизлары әзерләү үзәге базасында 7 ноябрьдән алып 11 ноябрьгә кадәр симпозиум узачак. Аны Россия ислам университеты (РИУ) һәм Мәгариф, фән һәм мәдәният мәсьәләләре буенча ислам оешмасы (ИСЕСКО) үткәрә.

Әлеге чарага Россиядән, Марокко, Кувейт, Мисыр, Кыргызстан һәм Украина кебек илләрдән катнашучылар җыелды, алар арасында Бөтендөнья Коръән хафизлары әзерләү буенча оешманың генераль сәркатибе (секретарь) урынбасары, доктор Әнәс Әхмәд Карзун, Мәгариф, фән һәм мәдәният мәсьәләләре буенча ислам оешмасының (ИСЕСКО) мәгариф департаменты директоры Йосыф Фадль Мөхәммәд Әбү Дакка, Кувейтның ислам фәне оешмасы рәисе Хәмәд әс-Синан һәм башкалар да бар иде.

Конференция кысаларында татар рухание Муса Бигиевның ике томлык китабы презентациясе булды. Әлеге басманың уникальлеге шунда ки, анда Муса Бигиевның үзе тарафыннан эшләнгән Коръәннең иске татар әдәби теленә тәрҗемәсе дә кертелгән. Әлеге тәрҗемә 1912 елда мөфти тарафыннан тыела һәм 100 елга якын басылмый, шулай итеп, әлеге китап киң укучылар тарафына беренче мәртәбә тәкъдим ителде.