Хаҗ буенча белешмә сигез телдә басылып чыкты

Мисырның фәтвалар буенча «Dar Al-Iftaa» оешмасы хаҗ һәм гомрә (кече хаҗ) буенча белешмә бастырып чыгарды.

Китапта хаҗ кылу тәртипләренә кагылышлы үтә мөһим сорауларга тулы җаваплар бирелгән; ул “Аллаһының кунаклары”на, шулай ук аэропортлардагы сәфәр кылучыларга, диңгез портларында һәм туристик компанияләрдә бушлай таратылачак. Әлеге белешмә сигез халыкара телдә басылган, алар – гарәп, инглиз, француз, алман, урду, малайск, төрек һәм рус телләре.

АРЕ мөфтие, доктор Гали Гомаа әйтеп үткәнчә, хаҗ сезоны башлану белән «Dar Al-Iftaa» исеме астында дөнья күргән хаҗ буенча яңа белешмә белән янәшә зур ихтыяҗ тудырган “ураза турындагы китап” килә. Анысы Рамазан аена кадәр басылган иде. Ул әйткәнчә, хаҗ турындагы белешмә заманча метод белән мөселманнарны фәтвалар белән таныштырачак, анда хәзерге чорның ихтыяҗлары да исәпкә алынган. Аның язылу теле шулкадәр гади ки, һәрбер хаҗи үзенең соравына бернинди авырлыкларсыз җавап таба һәм аны аңлый алачак, дип билгеләп үтте мөфти.

«Dar Al-Iftaa» директоры Әшрәф Фәһми үз ягыннан хәбәр иткәнчә, белешмә хаҗның барлык гамәлләрен дә үз эченә ала, шулай ук анда аның мәгънәсе, сере һәм барлык детальләре дә салынган. Игътибар үзәгенә аныклык һәм ритуалны үтәү тәртибе кабул ителде, шулай ук Пәйгамбәребез (с. г. в.) сөннәте белән калыплашкан положениеләрдән тайпылуга урын бирелмәде һәм бәхәсле сорауларны искә алмыйча, күпчелек галимнәр килешүендә язылды, дип яза “Ислам порталы”.