Бүген Казанда “Мөселман модасы атналыгы” башланды

Бүгеннән Казанда “Мөселман модасы атналыгы” башлана. Ягъни бүген, дүшәмбе көнне үк катнашучыларның килеп җитүе көтелә.

“Мода атналыгы” кысаларында мәдәни чаралар, танылган дизайнерлар тарафыннан мастер-класслар узачак. 28 октябрьдә “Мөселман киемнәрен реализацияләү һәм җитештерү, бизәү, дизайн-проектлау мәсьәләләре” («Проблемы дизайн-проектирования, оформления, производства и реализации мусульманской одежды») дигән темага түгәрәк өстәл узачак. Чарага дизайнерлар, рәссам-модельерлар, бизнес вәкилләре – кием җитештерүчеләр һәм бутик, кибет, сәүдә фирмалары директорлары җыелачак.

Форум «Islamic clothes» халыкара мөселман киеме дизайнерлары конкурсы” һәм мөселман модасы дөньясындагы соңгы тенденцияләрне күрсәтү белән төгәлләнәчәк.  

Конкурска танылган модельерлар, төрле дизайн студияләре һәм мәктәпләре, шулай ук Индонезия, Гыйрак, Иран кебек чит илләрдән утыздан артык гариза кабул ителгән.

Конкурста барлык катнашучыларны кыйммәтле бүләкләр, дипломнар көтә. Җиңүчегә бирелә торган гран-при 100 мең сум тәшкил итәчәк. Конкурсның жюри составына Россия һәм чит ил мода индустриясе әһелләре, мәдәният мэтрлары һәм күренекле җәмәгать эшлеклеләре кертеләчәк.

Конкурсны Татарстан Республикасы мөселманнары Диния нәзарәте, Татарстан Республикасы һәм Россия Федерациясе дизайнерлары Шурасы, “Татарстан мөслимәләре Шурасы” иҗтимагый оешмасы үткәрә.