Татарстаннан хаҗга баручыларның беренче төркеме 23 октябрьдә сәфәргә кузгалачак

2010 елның 23 октябрендә 03:05 сәгатьтә Казан шәһәреннән хаҗга баручыларның 49 кешелек беренче төркеме (группа) кузгалачак. Төркем Казан – Истанбул – Мәдинә – Мәккә маршруты буенча хәрәкәт итәчәк.

Согуд Гарәбстаны корольлеге тарафыннан бирелгән квоталарның быел барысы да тулды. Ике мең хаҗга баручының күпчелеге – Татарстанның күрше төбәкләреннән һәм Россия өлкәләреннән.  

Хаҗның составын быел 19 кеше раслады. Аңа административ эшчеләр, ТР Сәламәтлек саклау министрлыгыннан билгеләнгән табиблар һәм кайбер төркем җитәкчеләре керде. Хаҗилар белән Сөләйман Зарипов, Рөстәм Зиннуров, Линур Сабирҗанов, Рамил Бикбаев һ. б. йөриячәкләр.

Хаҗга баручыларның икенче төркеме Изге җирләргә 2010 елның 27 октябрендә кузгалачак.

13 ноябрь – хаҗ гамәлләре башланган көн, бу көнне Мина үзәнлегенә чыгачаклар. 15 ноябрь – Гарәфәт көне, хаҗилар шул тауда торачаклар. 16 ноябрь – Корбан бәйрәме. Хаҗиларның Согуд Гарәбстанында булу вакыты 14 көннән алып 37 көнгә кадәр тәшкил итәчәк.