Чечняда туташларны, хатын-кызларны урлауга карата 1 сум миллион штраф кертеләчәк

Чечня Республикасында киленнәрне урлауга карата чамадан тыш җәзалар кертелә. Бу хакта Чечня Республикасы мөселманнары Диния нәзарәте рәисе Солтан Мирзаев республиканың торак пунктларындагы имамнар һәм казыйлар белән очрашу вакытында белдерде.

Мөфти сүзләренә караганда, киленнәрне урлап алу аларның гаиләсен мыскыл итү була. С. Мирзаев билгеләп узганча, бу чечен традицияләренә каршы килә һәм гаиләләр арасында конфликтлар килеп чыгуга сәбәпче була, шул сәбәпле озак вакытлар дәвамында дошманлык хисе саклана.

Ул искәртеп үткәнчә, киленнәргә кагылу Коръән һәм Россия законнарына каршы килә һәм кызлар урлауның трагедия белән төгәлләнгән очракларына да мисаллар шактый. Узган елны бер кызны урлаган егетләр, арттан куалаулары сәбәпле, кызу тизлек белән чабалар һәм ДТП килеп чыгуга сәбәпче булалар: нәтиҗәдә 4 кешенең гомере озелә, шул исәптән урланган кызның да.

“Киленне урлап алган өчен җаваплылык җинаятькә сәбәпче булган кешегә дә, дин әһеленә дә, кемнең дә булса басымы астында урланган кыз өчен урлаучыга никах укытырга ризалык биргән әти кешегә дә җаваплылык төшәчәк. Моннан тыш соңгысы урланган кызның әти-әнисенә бер миллион сум акча түләргә тиеш булачак. Үзенең абруе белән файдаланып, кызның әтисенә психологик басым ясаганы өчен имам яки казый үзенең вазыйфаларыннан төшереләчәк һәм, шуның белән бергә, – рухи дәрәҗәләрдән дә”, – дип бирә Чечня хөкүмәтенең матбугат хезмәте Солтан Мирзаевның сүзләрен.