Новоалтайскта яңа җәмигъ мәчет төзергә телиләр

“Банкфакс” информацион серверы хәбәренә караганда, җәмигъ мәчетенең эскизы төзелеш советы белән килештерелгән. Утырышның исә 23 сентябрьдә Новоалтайск хакимияте башлыгы Владимир Иванов рәислегендә узганлыгы хәбәр ителә.

Алдагы этап – халык тыңлауларын оештыру һәм мәсьәлә уңай якка хәл ителгән очракта төзелеш проектына нокта кую.

Булачак мәчет бинасы Тополиная ур., 11 йорт адресы буенча урнашыр, дип көтелә (яңа Рассвет микрорайоны белән иске Бажово микрорайонына каршы якта). Комплекска 4 бина керәчәк, аның алып торган җир мәйданы 1,5 мең кв. м булыр, дип планлаштырыла. Ә мәчет мәйданы 455 кв. м булачак һәм ул үзенә 300 кешене сыйдырачак.

Шулай ук яшел мәйданчык та урын алачак. Проектта машина кую өчен 50 урын каралган.