«Райян» төркеме фанатлары белән очрашты

Казанда гөрләп эшләп ятучы «Шәрык» клубында кунакта “Райян” төркеме булды. Очрашуда «Болгар иле» клибының каралама варианты да күрсәтелде. Аны төшерүдә «Болгар» хәйрия фонды, видеооператорлар Ринат Әмиров, Аркадий Орешников һәм «Шәрык» клубы активистлары үзләре дә катнашкан.

Азат Гадиев белән Вәли Фазлыйәхмәтов дини җырлар җырлый торган “Райян” төркемен оештырып, узган елны «Казан егетләре» төркеменнән аерылып чыкканнар. Алар җыр сәнгате, иҗат һәм дин турында, гомумән, яшьләрне ниләр кызыксындыра, шул турыда да сөйләде.
Аксубай районы Яңа Ибрай авылы егете Азат һәм Башкортстан республикасының Нефтекамски шәһәрендә туган Вәли «Казан егетләре»ндә эшләгәндә үк Ислам динен кабул итеп, эчке дөньяларына туры килерлек җырлар иҗат итә башлаган булуларын җиткерде. Җырчылар бүгенге рухи эзләнүләре, гаилә тормышлары турында да бәян итте.

Шунысы кызык, Шәрык яшьләр клубы мөселманнар өчен кызыклы очрашуларны даими ясап тора, биредә ел саен Рамазан аенда ифтар мәҗлесләре уза. Шулай ук, монда килүчеләр намазлар укый. Мөселманнар өчен танушылар хезмәте дә эшли. Ул бушлай хезмәт күрсәтә. Телефон: 89503141268. Шулай ук, дүшәмбе көннәрендә вәгазь тыңлыу оештырыла. «Шәрык» клубының һәр чарасы Аллаһ ризалыгы өчен эшләнә. Сезне көтеп калабыз: Казан шәһәре, К. Маркс ур., 41/13 нче йорт.

Ләйсән Гобәйдуллина,

КДУ студенты