"Сөләйман"да Ураза бәйрәме уңаеннан тантана булып узды

Бүген "Сөләйман" мәчетендә Ураза Гаете уңаеннан тантаналы чаралар булып узды. Бәйрәм сәгать 5 иртәнге намаз белән башланып китте. 6.30 минутта Гает намазы башланды. Бу намазларда Левченко бистәсеннән килгән бик күп ир-ат катнашты. Шулай ук хатын-кызлар, Мәскәү администрациясе вәкилләре дә бар иде.

"Сөләйман" мәчете имам хатибы Илдар хәзрәт Баязитов мөселманнарга Рамазан ае һәм ураза тотуның хасиятләрен сөйләде. "Кичә изге Рамазан ае тәмамланды. Бу айда без иртәннән алып кичкә кадәр ашау-эчүдән тыелып тордык. Ураза - рухи яктан кешенне сафландыра, изге гамәлләр кылырга өнди. Без тәравих намазларын укыдык, ислам турында вәгазъләр тыңладык, хәлебездән килгәнчә ятимнәргә, аз керемле кешеләргә булыштык", - дип сөләде ул.

Чыгыш вакытында хәзрәт шәһәр мэры Илсур Метшиннан килгән котлау телеграммасын укып үтте. Телеграммада: "Хөрмәтле Илдар хәзрәт Баязитов,мөселманнар! Сезне изге Рамазан ае тәмамлану һәм нурлы Ураза бәйрәме белән тәбрик итәм. Безнең барыбыз өчен дә изге Рамазан зур әһәмияткә ия. Әл-Бәкарә сүрәсеннән күргәнчә кешеләргә Коръән Кәрим иңдерелгән бу айда мөселманнар Аллаһы тәгаләгә ихласлык һәм тугрылыкларын тагын да ныграк белдерәләр. Рамазан безне күркәм ниятләргә һәм игелекле эшләр кылырга өнди.

Әлеге изге айның игелеге һәм рәхимлеге киләчәктә дә безгә юлдаш булыр дип чын күңелдән ышанам. Сезгә һәм якыннарыгызга сәламәтлек, мәхәббәт, иминлек һәм бәхет телим. Аллаһы Тәгалә безне үзенең рәхмәтеннән һәм мәрхәмәтеннән ташламасын. Ураза бәйрәме мөбарәк булсын", - дип язылган котлауда. Гает намазыннан соң кунаклар Коръән сүрәләрен тыңлады һәм ураза табыныннан сыйланды.