Уфада башкорт телен көчләп укытуга ризасызлык белдерделәр

Башкортстандагы татар, рус, мари һәм чуаш милли оешмалары Уфада үзләренең берлектәге урам җыенын оештырды. Пикетта Башкортстан мәктәпләрендә башкорт булмаган балаларга башкорт телен көчләп укытуга каршылык белдерелде.

Урам җыены Ак йорт каршында, ягъни Президент һәм Хөкүмәт урнашкан бина янында үтте. Милли оешмалар яңа президент Рөстәм Хәмитовка республика мәктәпләрендә башкорт теленең ихтыярсызлап укытылуы хакында мәгълүматлар язып мөрәҗәгать әзерләгән. Пикет тәмамлангач, берничә кеше Хөкүмәт йортына кереп, шул мөрәҗәгатьне президентка тапшыру өчен, аның идарәсенә калдырып чыкты.

Пикетта катнашучылар арасында хатын-кызлар да, мәктәп балалары да бар иде. Алар “Башкорт теле көчләп укытылмасын”, “Башкорт телен теләгәннәр генә укысын”, “Татар балалары башкортча укытуга мохтаҗ түгел”, “Мари гимназияләре ачылсын”, “Чуаш халкы да үз телендә укырга тели” кебек шигарьләр тотып торды.

Пикетта катнашучылар бирегә килгән журналистлар белән аралашты һәм үз таләпләре хакында тәфсиллерәк сөйләде. Әгәр башкорт телен көчләп укыту дәвам итсә, мондый пикетлар оештыруны дәвам итәчәкләрен белдерде урам җыенында катнашучылар. Бу хакта "Татар-информ" агентлыгы хәбәр итә.