Каһирәдә Ислам сәнгате музеенда төзекләндерү эшләре тәмамланган

80 меңнән артык экспонат сакланган әлеге ядкарьханәдә төзекләндерү эшләре 7 ел дәвамында барган.Каһирәнең (Мисыр) Ислам сәнгате музеенда барган төзекләндерү эшләре, ниһаять, тәмамланган. Ислам сәнгате музейлары арасында Якын Көнчышта беренче һәм иң зурларыннан саналган, 80 меңнән артык экспонат сакланган әлеге ядкарьханәдә төзекләндерү эшләре 7 ел дәвамында барган, дип хәбәр итә “stejka.com” порталы.

XX гасыр башында итальян архитекторы Альфонсо Манескалой (Alfonso Manescala) тарафыннан салынган булып, еллар узу белән, аның диварлары ярыла, кыршыла башлаган. Ябылыр алдыннан әлеге бинада 3 меңләп экспонат булган. Якын арада ачылачак Ислам сәнгате музеена аяк басканнар яңартылган һәм 1,7 мең эспонаттан торган экспозиция белән таныша алачак.

Музей директоры Мөхәммәд Аббас Сәлим сүзләренчә, пирамидалар һәм Мисырның башка тарихи ядкарьләре белән чагыштырганда, Ислам сәнгате кеше күзеннән шактый яшерен, музей исә аның ядкарьләрен киң җәмәгатьчелеккә мөмкин кадәр күбрәк тәкъдим итәргә җыена.Искәртеп үтәбез: Ислам дине Мисырда, дәүләт Гарәп хәлифәтенә кушылганнан соң, VII гасырда таралыш алган һәм төп дин санала.