Башкортстанда хәләл күргәзмә үтте

7 августта Башкортстанның Мәләвез шәһәрендә хәләл азык-төлек ярминкәсе ачылды. Күргәзмәдә Башкортстаннан 13 оешма, Чиләбе, Белгород өлкәләреннән кунаклар үз хәләл продукцияләрен тәкъдим итте. Халыкка тәкъдим ителгән азык-төлекнең күбесе - ит ризыклары, кондитер эшләнмәләре һәм бал. Барлык ризыклар да шәригать кануннарына хилафлык китермичә әзерләнгән. Шуңа күрә алар сатып алучыларда зур кызыксыну уята.

Күргәзмәдә хәләл медицина хезмәтләре дә тәкъдим ителде. Аларның саны әлегә күп түгел. Әмма илдә мөселманнар саны артуны исәпкә алганда, мондый төр хезмәтләрнең киләчәге зур. Күргәзмәдә шулай ук дини әдәбият, төрле сувенирлар, ислам атрибутикасын да табарга була.

Күргәзмәне ачу тантанасында Башкортстан мөселманнар Диния нәзарәте вәкилләре, Диния нәзарәте карамагындагы «Хәләл» комитеты хезмәткәрләре, рәсми кунаклар катнашты. Ачылу тантанасыннан соң күргәзмә-ярминкә үтә торган мәйданда бәйрәм концерты булды. Ә көннең икенче яртысында хәләл җитештерүчеләр сертификация комитеты вәкилләре катнашында семинар-киңәшмә үтте.

Сүз уңаеннан, Башкортстанда хәләл эшләнмәләр җитештерү елдан-ел арта бара. Хәләл азык-төлек мөселманнар арасында гына түгел, ә башка дин вәкилләре арасында да популяр. Әйтергә кирәк, I Хәләл продукция күргәзмә-ярминкәсе Башкортстанда быелның мартында үткәрелгән иде. Ул күргәзмә Дүртөйледә оештырылды. Алдагы III Хәләл продукция күргәзмә-ярминкәсе Уфада үтәчәк, дип хәбәр итә «Башинформ» мәгълүмат агентлыгы.