Нальчикта дини яшьләр лагере тәмамланды

Кабарда-Балкар республикасы башкаласы Нальчикта дини яшьләр өчен җәйге алан үз эшен тәмамлады. Әлеге аланның төп үзенчәлеге шунда иде ки, биредә мөселман яшьләре дә, христиан яшьләре дә бергә ял итте. «Толерантлык - уңышның нигезе» дигән шигарь астында үтүче лагерь 60лап яшь дин вәкилен җыйган иде. Алар 10 көн дәвамында биредә төрле мәсьәләләр турында фикер алышты, сүз иреге, әхлак, дин тоту турында «түгәрәк өстәл»ләрдә, семинар-тренингларда катнашты. Шулай ук яшьләр өчен бик бай мәдәни, спорт программасы да төзелгән иде, дип хәбәр итә «Кавказский узел».

Кабарда-Балкар республикасы мөселманнар Диния нәзарәте рәисе Хәзрәтгали Җасеҗев әлеге лагерь эшчәнлегеннән бик канәгать калган. «Бик фикерле яшьләр җыелган иде. Алар үзләренең фикерләрен әйтә, аны исбатлый ала. Киләчәк аларның кулында», - диде бу уңайдан Хәзрәтгали әфәнде.

Әйтергә кирәк мондый лагерь беренче тапкыр гына үткәрелми. Моңа кадәр шушындый ук аланнар Ставрополь, Карачай-Черкес республикаларында оештырылган булган. «Ул вакытта без әлеге проектның нинди уңышлы булачагын уйлап та карамаган идек», - диде бу уңайдан Төньяк кавказ мөселманнары Координация үзәге рәисе Исмәгыйль хаҗи Бердиев.