Германиядә табутсыз да күмәргә рөхсәт ителәчәк

Моңа кадәр Берлинда мәетләрне бары тик табутта гына күмгәннәр. Башкача күмү мөмкинлеген чикли торган закон гамәлдә булган. Әлеге закон Германиядәге мөселманнарда зур канәгатьсезлек тудыра иде. Алар бу мәсьәлә буенча берничә тапкыр җитәкчелеккә дә мөрәҗәгать иткән. Менә, ниһаять, Берлин җитәкчелеге табутка салмыйча да җирләүне рөхсәт итә торган закон кабул иткән, дип хәбәр итә  «Welt» газетасы. Үзгәрешләр мөселман өммәте соравы буенча кертелә, дип белдерә җитәкчелек.

Моңа кадәр табутта күмү мәҗбүри булганлыктан, мөселманнарның күбесе мәрхүмнәрне туган илләренә алып кайтып җирләгәннәр. Кайбер мәгълүматлар буенча Германиядә яшәүче мөселманнарның 90-95%ы туганнарын башка илдә күмәргә мәҗбүр икән.

Хәер, мөселманнарның канәгатьсезлегенә игътибар итүчеләр дә бар икән. Моннан 15 ел элек  Германиядәге федераль җирләрдән иң беренче булып Гамбург мәетләрне табутсыз җирләргә рөхсәт иткән. Тагын берничә шәһәрдә мөселманча күмү оештырырга мөмкин. Җитәкчелек кабул иткән яңа закон исә мөселманнар өчен тагын да зур мөмкинлекләр ача.

Әмма әлеге үзгәрешкә каршы булучылар да бар икән. Күмү мәшәкатьләрен үз өстенә алучы компанияләр табут сату кимемәсме икән, дип борчыла. Шулай ук алар табутсыз күмү мәшәкатьлерәк булачак, дип тә белдергән. Җитәкчелек үз чиратында мондый оешмаларга карап тормаска ниятли. Тиздән әлеге законны Берлин парламенты карап, соңгы сүзне әйтергә тиеш, дип хәбәр итә Lenta.ru сайты.