Германиядә «Коръән: 1400 ел көндәлек тормыш» дип аталган фотографияләр һәм рәсемнәр конкурсы

Германиядә «Коръән: 1400 ел көндәлек тормыш» дип аталган фотографияләр һәм рәсемнәр конкурсы үтә. Әлеге конкурс Коръән иңдерелүгә 1400 ел тулуга багышлап оештырыла. Конкурста 16 яшьтән өлкәнрәк егетләр үз иҗат җимешләрен юллый ала.

Эшләр 31 августка кадәр кабул ителә. Рәсемнәрдә һәм фотосурәтләрдә Коръән аятьләренең табигатьтә, гаиләдә, көндәлек тормышта чагылышы күрсәтелгән булырга тиеш. Эшләр А4 һәм А5 форматларында гына кабул ителә, дип игълан бирә оештыру комитеты.

Җиңүчеләргә бик кыйммәтле бүләкләр әзерләнгән. 1-4 урынны алган егетләргә генә түгел, ә калган катнашучыларга да төрле дәрәҗәдәге бүләкләр әзерләнгән. Мисал өчен, кемдер кече Хаҗда (Гомрә) булып кайтачак, бер җиңүчегә Истамбулга сәяхәт бүләк ителәчәк. Шулай ук ноутбук, кесә телефоны кебек бүләкләр дә үз хуҗаларын көтә.

Сүз уңаеннан, Рамазан аенда Германиянең барлык мәчетләрендә дә диярлек ачык ишекләр көне үткәрелә. Теләгән һәркем мәчеткә кереп, үзен кызыксындырган мәгълүмат ала. Әлеге конкурс та шушы Рамазан программасы кысаларында үткәрелә, дип хәбәр итә Lenta.ru.