Нальчикта дини яшьләр өчен җәйге алан эшли башлады

Кабарда-Балкар республикасы башкаласы Нальчикта дини яшьләр өчен җәйге алан эшли башлады. Әлеге аланның үзенчәлеге - биредә мөселман яшьләре дә, христиан яшьләре дә ял итә. «Толерантлык - уңышның нигезе» дигән шигарь астында үтүче лагерь 30лап яшь дин вәкилен җыйган. Алар 10 көн дәвамында биредә төрле мәсьәләләр турында фикер алышачак, тематик «түгәрәк өстәл»ләрдә, семинар-тренингларда катнашачак. Шулай ук яшьләр өчен бик бай мәдәни, спорт программасы да төзелгән, дип хәбәр итә «Кавказский узел».

«Төрле дин тотучы яшьләр бер-берсеннән ерагаймасын, дошманлашмасын өчен кулдан килгәннең барысын да эшләргә кирәк», - дип белдерде Кабарда-Балкар президенты Арсен Каноков.

Әйтергә кирәк мондый лагерь беренче тапкыр гына үткәрелми. Моңа кадәр шушындый ук аланнар Ставрополь, Карачай-Черкес республикаларында оештырылган булган. «Ул вакытта без әлеге проектның нинди уңышлы булачагын уйлап та карамаган идек», - диде бу уңайдан Төньяк кавказ мөселманнары Координация үзәге рәисе Исмәгыйль хаҗи Бердиев.