Төркмәнстанда иң борынгы мәчетне төзекләндерәләр

Төркмәнстанда иң борынгы мәчетне төзекләндерү эшләре башланган, дип хәбәр итә «Туркмен-информ» агентлыгы.

Төрекмәнстандагы иң борынгы мәчет булып Балкан төбәгендә урнашкан Машад-ата мәчете санала. Аны шулай ук Шир-кабир дип атыйлар. Әлеге мәчет суфи шәех Гали ибн-Суккари мавзолее да булып тора. Бу тарихи һәйкәл бүгенге Төркмәнстанның көньяк-көнбатышында, Дехистан (Машат-Мисриан) оазисында урнашкан. Белгечләр фикеренчә, XII гасырда төзелгән бу мәчет безнең эрага кадәр III гасырдан башлап, безнең эраның XIV гасырына кадәр яшәгән цивлизация тарафыннан төзелгән. Монголлар явы вакытында бу цивилизация тар-мар ителә, әмма соңыннан янә үсеп китә ала. Бу җирләрдә сулар кипкәч, биредәге шанлы дәүләт юкка чыга.

Тарихи һәйкәлне төзекләндерүдә Мары һәм Куняургенчтан җирле белгечләр, шулай ук Россия һәм Америкадан чакырылган архитекторлар да катнашкан. Төзекләндерү «Мәдәни мирасны саклау» дигән дәүләт программасы кысаларында тормышка ашырыла.

Сүз уңаеннан, бу архитектура һәйкәле ЮНЕСКО исемлегенә дә кертелергән. Төзекләндерүдән соң ул Төркмәнстанның үзәк туристик корылмасына әйләнергә мөмкин. Туристлар агымының артуына Бәрәкәт -Этрек маршруты буенча йөри торган, Иран, Төркмәнстан һәм Казахстанны берләштереләчәк тимер юл төзү дә ярдәм итәчәк, дип күздә тотыла.