Татарстанда «Балтач» хәләл индустрия паркы булырга мөмкин

Татарстанда «Балтач» хәләл индустрия паркы булырга мөмкин. Бу өлкәдә эш алга китәргә тора. Чөнки Малайзиянең  «Амана Райя Берхад» компанияләр төркеме белән Казандагы «Линова» компаниясе арасында «Балтач» хәләл индустрия паркын үстерү буенча Меморандум шушы көннәрдә имзаланыр дип көтелә. Әлеге тантана Малайзия делегациясенең ТР Президенты Рөстәм Миңнеханов белән очрашуы вакытында булачак.

Малайзия делегациясе бүген ТР Сәнәгать һәм сәүдә министрлыгында булды. Министр урынбасары Булат Фәхретдинов, Казандагы «Линова» компаниясе вәкилләре белән Малайзия Премьер-министры каршындагы канцелярия министры Мөхәммәд Назри Азиз очрашып, алга таба хезмәттәшлек турында сөйләште, дип хәбәр итә министрлыкның матбугат хезмәте.

Малайзия делегациясе Татарстанга эш сәфәре вакытында «Казан компрессормаш» ААҖ, «Q-Park» логистика терминалында, Казан дәүләт медицина университетында булачак. Программада шулай ук ТР Дәүләт Советы рәисе Фәрит Мөхәммәтшин белән очрашу да каралган.

Узган ел тышкы сәүдә әйләнеше күләме буенча Малайзия 61 нче урын алган. 2008 елга караганда, 2009 елда ике арада тышкы сәүдә әйләнеше күләме 4,1 тапкырга үскән һәм 4039,6 мең доллар тәшкил иткән. Алар барысы да импорт операцияләре. Агымдагы елның беренче кварталы йомгакларына килгәндә, тышкы сәүдә әйләнеше күләме 712,5 мең доллар булган. Шуның 190 мең доллардан артыгы-экспорт, 522 мең доллары –импортка туры килә.