Россиядә мәчет төзү җиңел түгел

Мәчетләр төзү хәтта Россиянең мөселманнар күр яшәгән төбәкләрендә дә зур проблема, дип белдерде Мәскәүдәге Мәрмәр мәчетнең имамы  Шамил Галәветдинов «Эхо Москвы» радиосына биргән әңгәмәсендә. Шамил Галәветдиновны радиодагы «Исламская идентичность и религиозный радикализм» тапшыруына чакырганнар иде.

«Хәтта җитәкчелек тарафыннан рәсми рөсхәт булса да, җирле хакимият мәчет төзелешенә барыбер аяк чалырга мөмкин. Мәскәү янындагы Громов шәһәрендә шулай булды», - ди Ш.Галәветдинов. Әңгәмә барышында ул үзенең Төньяк Кавказга сәяхәте турында сөйләде. Хәтта анда да мәчетләргә караганда чиркәүләр күбрәк төзелә, дип билгеләп үтте ул.

«Мин Кавказның бер республикасында булдым. Кайсы республика икәнен әйтеп тормыйм инде. Җитәкчелек вәкиле белән сөйләшеп торырыга туры килде. Аның сүзләренчә, республика халкының 60%ы ислам динен тота. Төбәктә шуңа күрә мәчетләр дә, чиркәүләр дә бар. Әмма чиркәүләрнең саны мәчетләрнекенә караганда күбрәк. Мәчетне төзекләндерергә яки яңадан төзергә Мәскәү рөхсәт бирә. Әмма җирле хакимият мөселманнарын бу уйларыннан бик тиз кире кайтара», - дип белдерде ул.

Бу уңайдан Галәветдинов Россияне Кытай белән чагыштырды. Әлеге ике илдә дә 20 миллион тирәсе мөселман яши икән. Әмма Мәскәүдә 4 кенә мәчет эшли, ә Пекинда - 70. Россия буенча мәчетләрнең саны 6000 тирәсе икән. Кытайда исә 30 000 мәчет мөселманнарга хезмәт күрсәтә. «Безнең тәрбиябез башка төрле шул. Яңаны төзергә түгел, искесен дә җимереп атарга тырышабыз», - диде борчылып Шамил Галәветдинов.