«Мәктәпкә җыенырга ярдәм ит» әбезме?

Татарстанда 27 июльдә «Мәктәпкә җыенырга ярдәм ит» акциясе старт ала. Әлеге акция быел дүртенче тапкыр оештырыла. Бу хакта бүген ТР Мәдәният министрлыгы бинасында видеоконференция режимында узган киңәшмәдә ТР Президентының Социаль мәсьәләләр буенча ярдәмчесе Татьяна Ларионова хәбәр итте, дип яза «Татар-информ».

Быел республикада 37 356 бала беренче сыйныфка бара. Шуның 7633е – аз керемле, әти-әниләре инвалид булган, тәрбиягә алынган, имин булмаган гаиләләрдә үсә. Алар арасында физик мөмкинлекләре чикләнгән сабыйлар да бар. Бу укучылар башка балалар янында үзләрен ким хис итмәсен өчен, аларны мәктәп кирәк-яраклары белән тәэмин итү бурычы куела. Быел баланы беренче класска җибәрү өчен уртача 2 мең сумлык кирәк-ярак җыярга кирәк.

Узган елда мондый хәйрия ярдәме беренче сыйныфка баручы - 15 740 укучыга, II-XI сыйныфның 2673 укучысына күрсәтелгән. Хәйрия акциясеннән 19 млн. сумнан артык акча кергән. Бигрәк тә республиканың нефть чыгару белән шөгыльләнүче оешмалары, Серго исемендәге завод, «Алмаз» ачык акционерлык җәмгыяте, 140лап коммерция ширкәтләре һәм шәхси эшмәкәрләр активлык күрсәткән.

«Мәктәпкә җыенырга ярдәм ит» акциясе 25 августка кадәр дәвам итәчәк.