«Сәләт-Шәхес» лидерлар мәктәбе быел 10-27 августта үтә

«Сәләт» аланнары үз эшчәнлеген дәвам иттерә. Хәзер «Сәләт»леләр дүртенче сменага балалар туплый. Дүртенче смена инде берничә ел рәттән «Сәләт-Шәхес» лидерлар мәктәбе буларак оештырыла. Быел «Сәләт-Шәхес» 10-27 августта.

Лагерь 5-11нче сыйныф укучылары өчен. Катнашучылар район, республика һәм Россия күләмендә оештырылган бәйге-олимпиадалар нәтиҗәсендә сайлап алынды. Шулай ук чит төбәкләрдә яшәүче татар балалары да «Сәләт»не үз итә. Быел да Марий-Эль, Удмуртия, Самара, Ульяновски балалары ‹Сәләт-Шәхес»тә ял итәчәк, ди оештыручылар. Балалар белән махсус әзерләнгән, әйдаманнар мәктәбендә укып, конкурста җиңү яулаган студентлар һәм дәрәҗәле, чит илләрдә укып, эшләп тәҗрибә туплаган укытучылар эшли. Аланда чит ил студентлары һәм укытучылары да катнаша.

Дүртенче сменаның максаты — фән белән кызыксынучы балаларга үсеш юлларын күрсәтү, лидерлар һәм заман таләпләренә туры килердәй шәхес тәрбияләү.

«Сәләт-Шәхес» аланында дәресләр иҗади остаханә һәм махсус курслар рәвешендә оештырылган. Биредә «Математика», «Физика», «Чит телләр», «Татар теле», «Психология», «Журналистика», «Икътисад белеме» остаханәләре, бию, вокал, дизайн, театр буенча махсус курслар эшли. Үз-үзеңне өйрәнү һәм аңлауга юнәтелгән психологик тренингларга аерым игътибар бирелә. Быел балаларга сәнгатьле сөйләм, проектлар эшләү, лидерлык нигезләре, креатив фикерләү буенча да дәресләр биреләчәк.

Программада фәнни-гамәли конференцияләр, семинар, түгәрәк өстәлләр, танылган шәхесләр, җәмәгать эшлеклеләре белән очрашулар да каралган. Аланда «Потанин ярышлары», «Квэст», «Йолдызлар яңгыры» кебек мәдәният һәм спорт чараларына да аерым вакыт билгеләнгән. Футбол, волейбол, баскетбол, өстәл теннисы, пионербол, шахмат буенча алан беренчелекләре дә оештырыла.

«Сәләт-Шәхес»тә ял итәргә теләүчеләр (843) 293-82-00 телефоны буенча языла яки selet.biz сайтында анкета тутырып җибәрә ала.