«Алло, мин террорчы булырга теләмим!»: Германиядә экстремистлар өчен «кайнар элемтә» эшли

Германиядә экстремистлык яки террорчылык төркемнәренә эләккән мөселманнар өчен «кайнар элемтә» эшли башлады. Биредә радикаль төркемнәрдән китәргә теләүчеләргә психологик ярдәм күрсәтелә, кирәкле киңәшләр бирелә, алга таба нәрсә эшләргә кирәклеге аңлатыла, дип хәбәр итә AFP мәгълүмат агентлыгы.

Мондый хезмәт Конституцияне яклау федераль идарәсе тәкъдиме белән кертелгән. Әлеге махсус хезмәт төрле радикаль төркемнәр эшчәнлеген туктату белән шөгылләнә.

Әлеге проект HATIF, дип атала. Әлеге сүз гарәпчәдән «телефон» дип тәрҗемә ителә икән. Аны шулай ук «Heraus aus Terrorismus und islamistischem Fanatismus» (ягъни «Терроризм һәм ислам фанатизмы белән араны өзәргә») дигән җөмләнең кыскартылмасы буларак та аңлатып була. «Терроризм белән арасын өзәргә» теләүчеләр 19 июльдән башлап, 0221/7926999 телефоны буенча шалтырата яки HATIF@bfv.bund.de электрон почтасына яза ала.

Проект беренче чиратта төрле радикаль төркемнәргә эләккән кешеләрнең якыннары өчен эшләнә. «Кайнар элемтәдә» утыручылар гарәп телендә дә, төрек телендә дә сөйләшә.

Әлеге хезмәткә мөрәҗәгать итүчеләргә фатир, эш яки уку урыны табу буенча ярдәм дә күрсәтелергә мөмкин. Янаулар булган очракта алман хокук сакчылары ярдәмгә килергә вәгъдә бирә, дип хәбәр итә Lenta.ru.