Екатеринбург үзәгендә - хәләл ит ризыклары

Екатеринбургта хәләл ит ризыклары сата торган сәүдә ноктасы барлыкка килде. Ул шәһәрнең Шаршат базарында ачылды. Әлеге сәүдә ноктасын ачу тәкъдиме белән «Шанс» мөслимәләр клубына йөрүче Светлана Шәрипова чыккан. 

Моңа кадәр Екатеринбург мөселманнарына хәләл азык-төлек сатып алу өчен шәһәр читенә үк барырга туры килгән. Чөнки мәчетләрнең күбесе шәһәр читендә урнашкан. «Җәйге ялда Пермьгә барган идем. Пермь Үзәк мәчетендә дә булырга туры килде. Мәчетнең ишек алдында ук хәләл азык-төлек сата торган берничә кибет урнашкан. Сәяхәттән Екатеринбургның үзәгендә дә шундый сату ноктасы ачу хыялы белән кайттым. Нәтиҗәдә, ике атна дигәндә базарда шундый ноктаны ачып та җибәрдек. Эш бик уңай булды: Шаршат базары җитәкчелеге шушы көннәрдә генә бер сәүдә ноктасы бушаячагын хәбәр итте. Тиз арада җайлыйсы эшләрне җайладык та, сәүдә ноктасын ачып та җибәрдек», - дип шатлыгы белән уртаклаша Светлана ханым.

Ачылу көнендә беренче сатып алучылар өчен ризыкларны татып карау мөмкинлеге дә тудырылган. Иң кызыгы, хәләл ризыкларны мөселманнар гына түгел, ә башка милләт, дин вәкилләре дә яратып куллана икән. Сәүдә ноктасында 30 төрдәге ит ризыклары сатып алырга мөмкин. Сатып алучыларга берничә төрдәге казылык, ысланган ит, сосиска, сарделька кебек күп төрдәге ит ризыклары тәкъдим ителә. Алар башлыча Чиләбе, Татарстан, Самара һәм Башкортстан җитештерүчеләре тәкъдим иткән продукция, дип хәбәр итә «IslamNews.ru» сайты.