Зәйдәге «Иман» лагере икенче сменасын төгәлләде

«Нур» үзәк мәчете каршында эшләүче «Иман» җәйге лагере икенче ел рәттән шәһәр читендә эшли ала. Быел ул Югары Лузы авылы мәктәбе базасында оештырылды. Күптән түгел генә алан үзенең икенче сменасын төгәлләде. Смена 22 июньдә башланган иде. Биредә Зәй шәһәре, Кармалы, Кәрәкәс, Югары Пинәче авылыннан, республиканың төрле районнарыннан җыелган малайлар ял итте. Алар ял белән бергә ислам нигезләрен дә үзләштерделәр. Малайларга әдәп-әхлак, намаз уку, Коръән уку кебек дәресләр укытылды.

«Иман»да дүртенче ел ял итәм, - ди 15 яшьлек Илнур Әшрәпов. – Энекәшем Илдар да монда булды. Биредә безгә файдалы дәресләр бирәләр, намаз укырга өйрәтәләр. Беренче догаларны да мин монда ятладым, һәм моның тормышта кирәк булачагына ышанам».

Казанның Мирный бистәсеннән 10 яшьлек Айдар Гомәров «Иман»га беренче тапкыр килгән. «Монда табигать бик матур һәм ял итү шундый рәхәт! Лагерьда миңа барысы да ошый: табигатькә экскурсияләр дә, футбол уйнау да, ярышлар да, ашау да, дәресләр дә», - ди ул.

Егетләр беравыздан бу лагерньне оештыручыларга рәхмәт әйтәләр һәм киләчәктә дә монда килергә теләүләрен әйтәләр, дип хәбәр итә «Яңа Зәй» газетасы.