Казанның Универсиада авылының үз мэрын булачак

1 сентябрьдән Казандагы Универсиада авылы беренче тулай торакларының ишеген студентлар өчен ачачак. Студентлар шәһәрчегенең ике корпусында 8 мең студент яши алачак. Биредә аларга яшәү өчен ике һәм өч урынлы бүлмәләр бирелә. Тору бәясе шул ук – айлык стипендиянең 5 процентын тәшкил итәчәк. Урнашу август ахыры-сентябрь башларына планлаштырыла.

Тулай торак шартлары яхшыруга аеруча КФУда белем алучы мөселман студентлары сөенә. Чөнки моңа кадәр тулай торак бүлмәләрендә дүртәр кеше яшәргә туры килә иде. Мондый шартларда намаз уку шактый мәшәкатьле. «Универсиада авылыннан бүлмә алу өчен гаризаларны тапшырдык инде», - дип сөенечләрен уртаклашты алар.

Сүзә уңаеннан, Белградтан үрнәк алып, Казанның Универсиада авылының да үз мэрын булдырырга телиләр. Бу турыда шәһәр башлыгы Илсур Метшин мэриядагы утырышта әйтте. Метшин сүзләренә караганда, аңа Татарстан делегациясенең Белградка, Универсиада авылына сәяхәт кылу тәэсир иткән. Биредә спорт шәһәрчеге югары дәрәҗәдә оештырылган, аның белән элекке серб спортчысы идарә итә икән.

Белградтагы Универсиада авылы мэрын Казанга киңәшергә чакырдылар, дип хәбәр итә «Азатлык» радиосы сайты.